Хүний эрүүл мэндийг хамгаалах хамгийн анхны бөгөөд байгалийн арга бол эхийн хөхөөр хооллолт юм. Шинээр төрсөн нярайд хамгийн түрүүнд ялгардаг өтгөн шар өнгөтэй сүүг ангир уураг гэж нэрлэдэг. Ангир уураг нь нярайн өсөлт хөгжил, дархлаа тогтолцоог бүрдүүлэхэд онцгой чухал үүрэгтэй бөгөөд "анхны дархлааны вакцин" гэж хүртэл нэрлэдэг.

Ангир уураг гэж юу вэ?

Ангир уураг нь эх төрсний дараах эхний 2–5 хоногт ялгардаг өтгөн, шаргал өнгөтэй, уураг, амин дэм, эрдэс бодисоор баялаг сүү юм. Хэдийгээр хэмжээ нь бага байдаг ч нярай хүүхдийн ходоодны багтаамжид яг тохирсон, маш өндөр шим тэжээлтэй байдаг.

Ангир уургийн ач холбогдол

1. Дархлааг сайжруулна

Ангир уураг нь эсрэг бие , цагаан эс болон бусад хамгаалах бодисоор баялаг байдаг. Эдгээр нь нярайг нян, вирус, халдвараас хамгаалж, дархлааны тогтолцоог хөгжүүлдэг.

2. Хоол боловсруулах эрхтнийг хамгаална

Ангир уураг нь гэдэсний салстыг хамгаалж, ашигтай бичил биетний өсөлтийг дэмжинэ. Ингэснээр хоол боловсруулах эрхтэн хэвийн хөгжиж, халдварын эрсдэл буурдаг.

3. Өсөлт хөгжилд дэмжлэг үзүүлнэ

Уураг, А аминдэм, цайр болон бусад шим тэжээл нь эд эсийн өсөлт, тархи болон мэдрэлийн тогтолцооны хөгжлийг дэмждэг.

4. Шарлалтыг бууруулахад тусална

Нярайн гэдэсний хөдөлгөөнийг идэвхжүүлж, меконийг хурдан гадагшлуулахад тусалдаг. Үүний үр дүнд билирубин хуримтлагдах нь багасч, шарлалтын эрсдэл буурдаг.

5. Харшил, халдварт өвчний эрсдэлийг бууруулна

Судалгаагаар ангир уураг болон зөв хөхөөр хооллолт нь суулгалт, уушгины хатгалгаа зэрэг халдварт өвчний эрсдэлийг бууруулж, зарим харшлын өвчнөөс хамгаалах нөлөөтэй байдаг.

Эхийн хувьд үзүүлэх ашиг тус

Ангир уургаа хөхүүлэх нь зөвхөн хүүхдэд төдийгүй эхэд ч ашигтай. Үүнд:

• Умай хурдан агшихад тусалдаг.
• Төрсний дараах цус алдалтын эрсдэлийг бууруулдаг.
• Эх, хүүхдийн сэтгэл зүйн холбоог бэхжүүлдэг.
• Хөхний болон өндгөвчний хавдрын эрсдэлийг бууруулахад хувь нэмэр оруулдаг.