Нярай хүүхэд хамар нь битүүрэх, найтаах, нус гоожих үед олон ээж "Ханиад хүрчихэв үү, эсвэл харшил болов уу?" гэж эргэлздэг. Эдгээр нь төстэй шинж тэмдэгтэй ч шалтгаан, эмчилгээ нь өөр байдаг.

Ханиадны үед ямар шинж тэмдэг илэрдэг вэ?

Ханиад нь вирусийн халдвараас үүдэлтэй бөгөөд дараах шинжүүд илэрдэг.

·         Хамар битүүрэх, нус гоожих

·         Найтаах

·         Ханиалгах

·        Хоолой өвдөх (том хүүхдэд илүү түгээмэл)

·         Халуурах (ялангуяа нярай болон бага насны хүүхдэд)

·         Хөхөө муу хөхөх

·         Тайван бус болох, уйлагнах

·         Бие сулрах, унтамхай болох

Харшлын үед ямар шинж тэмдэг илэрдэг вэ?

Харшил нь вирусээс биш, харин тоос шороо, цэцгийн тоос, амьтны үс, тоосны хачиг зэрэгт дархлааны тогтолцоо хэт мэдрэг хариу урвал үзүүлэх үед үүсдэг бөгөөд дараах шинжүүд илэрдэг.

·        Олон дахин найтаах

·        Усархаг, тунгалаг нус гоожих

·        Хамар загатнах

·        Нүд улайж, загатнах, нулимс гоожих

·        Хамар битүүрэх

·        Халуурахгүй

·        Биеийн ерөнхий байдал хэвийн байдаг

Ханиад ба харшлыг хэрхэн ялгах вэ?

Ханиад болон харшлын эхний шинж тэмдэг маш төстэй байдаг. Хоёуланд нь хамар битүүрч, нус гоожиж, найтаах шинж илэрдэг учраас андуурах нь элбэг. Гэхдээ анхааралтай ажиглавал ялгааг нь мэдэх боломжтой. Хэрэв хүүхэд халуурч, бие нь сульдаж, уйлагнаж, хөхөө өмнөхөөсөө муу хөхөж эхэлсэн бол энэ нь ханиад байх магадлал өндөр. Харин хүүхэд халуурахгүй, нүд болон хамар загатнах,

усархаг тунгалаг нус гоожих нь харшлын нийтлэг шинж юм.

Мөн ханиад ихэвчлэн 5–10 хоногт эдгэрдэг бол харшлын шинж тэмдэг нь харшил үүсгэгчтэй ойр байх хугацаанд үргэлжилдэг.

Анхаарах нь: 6 сар хүрээгүй нярайд жинхэнэ харшил ховор тохиолддог. Хэрэв хүүхэд халуурах, амьсгал нь хүндрэх, хөхөө муу хөхөх зэрэг шинж илэрвэл өөрөө оношлохгүйгээр хүүхдийн эмчид яаралтай хандаарай.