Хүүхэд төрсний дараах эхний өдрүүдэд хөхний зөв арчилгаа нь хөхөөр амжилттай хооллох, сүүний ялгаралтыг хэвийн байлгах, хөхний өвдөлт болон үрэвслээс урьдчилан сэргийлэхэд чухал ач холбогдолтой.

1. Хүүхдээ төрсний дараах эхний 1 цагийн дотор амлуулах

Эрт амлуулах нь ангир уургийг хүүхэддээ өгөхөөс гадна сүүний ялгаралтыг идэвхжүүлдэг. Мөн эх, хүүхдийн холбоог бэхжүүлдэг.

2. Хүүхдээ зөв амлуулах

Хүүхэд зөвхөн хөхний толгой бус, бор хүрээний ихэнх хэсгийг амандаа багтаан хөхөх ёстой. Зөв амласан үед:

• Хөхний толгой өвдөхгүй.
• Хөх бүрэн суллагдана.
• Хүүхэд хангалттай сүү авна.

3. Хөхөө тогтмол суллах

Хүүхдээ хүссэн үед нь, өдөр шөнөгүй ойр ойрхон хөхүүлээрэй. Хөх хэт дүүрвэл хүүхдээ амлуулах эсвэл гараар, саалтуураар бага зэрэг суллаж болно.

4. Хөхөө цэвэр байлгах

• Өдөр бүр бүлээн усаар угаахад хангалттай.
• Саван, спиртэн уусмал хэрэглэхээс зайлсхийх нь арьсны хамгаалалтын тослогийг хадгална.
• Хөхүүлсний дараа хэдэн дусал эхийн сүүгээр хөхний толгойг чийглэн агаарт хатаавал арьс хамгаалагдана.

5. Хөхний толгой хагарахаас сэргийлэх

Хөхний толгой өвдөх, хагарах гол шалтгаан нь буруу амлуулалт байдаг. Хэрэв хагарсан бол:

• Хүүхдээ зөв амлуулах арга барилд анхаараарай.
• Хөхүүлсний дараа эхийн сүүгээр түрхэж хатаана.
• Хүчтэй өвдөлт, идээт үрэвсэл илэрвэл эмчид үзүүлнэ.

6. Тохиромжтой хөхний даруулга сонгох

• Биед эвтэйхэн, хэт бариу биш хөхүүл эхийн даруулга хэрэглээрэй.
• Чийгтэй болсон хөхний жийргийг ойр ойрхон сольж хэвшээрэй.

7. Дараах шинж илэрвэл эмчид хандаарай

• Хөх хүчтэй өвдөх
• Улайж халуу оргих
• Халуурах
• Хөхөнд хатуу, өвдөлттэй зангилаа мэдрэгдэх
• Идээтэй ялгадас гарах

Эдгээр нь хөхний сүүний саатал эсвэл үрэвслийн шинж байж болзошгүй тул эрт оношлуулж, эмчилгээ хийлгэх нь чухал.