Хүүхэд төрөх нь гэр бүлийн амьдралд баяр баясгалан авчирдаг ч эх хүний бие махбод, сэтгэл зүйд асар их өөрчлөлт гардаг үе юм. Төрсний дараа олон эхчүүд ядарч сульдах, сэтгэл санаа тогтворгүй болох, уйламтгай болох зэрэг өөрчлөлтийг мэдэрдэг. Эдгээр нь ихэвчлэн түр зуурын байдаг ч зарим эхчүүдэд удаан үргэлжилж, өдөр тутмын амьдрал болон хүүхдээ асрах чадварт нь нөлөөлөх хэмжээнд хүрдэг. Үүнийг төрсний дараах сэтгэл гутрал гэж нэрлэдэг.Энэ эмгэг нь энгийн гуниг, ядаргаа биш бөгөөд эмчилгээ, сэтгэлзүйн дэмжлэг шаардлагатай байж болно.

Төрсний дараах сэтгэл санааны өөрчлөлт ба сэтгэл гутралын ялгаа

Төрсний дараах эхний хэдэн хоногт олон эхчүүдэд "төрсний дараах гуниг" илэрдэг. Үүнд:

• Уйламтгай болох
• Сэтгэл санаа хурдан өөрчлөгдөх
• Түгших
• Ядарч сульдах
• Амархан уурлах

Эдгээр шинж нь ихэвчлэн төрснөөс хойш 3–5 дахь хоногт эхэлж, 1–2 долоо хоногийн дотор өөрөө арилдаг.

Харин шинж тэмдэг 2 долоо хоногоос илүү үргэлжилж, өдөр тутмын амьдралд ихээхэн саад болж эхэлбэл төрсний дараах сэтгэл гутрал байж болзошгүй.

Үүсэх шалтгаан

Төрсний дараах сэтгэл гутрал нь дараах хүчин зүйлсийн нөлөөгөөр үүсч болно.

• Эстроген, прогестерон зэрэг дааврын хэмжээ огцом буурах.
• Нойр хангалтгүй байх.
• Төрсний дараах биеийн өвдөлт, ядралт.
• Хүүхдээ асрах туршлагагүйгээс үүдэх айдас.
• Санхүүгийн болон гэр бүлийн дарамт.
• Гэр бүлийн дэмжлэг хангалтгүй байх.
• Өмнө нь сэтгэл гутрал эсвэл түгшүүрийн эмгэгтэй байсан түүх.

Илрэх шинж тэмдэг

Төрсний дараах сэтгэл гутралын үед дараах шинжүүд илэрч болно.

• Удаан хугацаанд гунигтай байх.
• Байнга уйлах.
• Юманд сонирхолгүй болох.
• Хэт ядрах.
• Нойргүйдэх эсвэл хэт их унтах.
• Хоолны дуршил өөрчлөгдөх.
• Өөрийгөө буруутгах.
• Өөрийгөө сайн ээж биш гэж бодох.
• Анхаарал төвлөрөхгүй байх.
• Хүүхэдтэйгээ холбоо тогтооход хүндрэлтэй санагдах.
• Түгшүүр, айдас ихсэх.

Хүнд тохиолдолд өөрийгөө эсвэл хүүхдээ гэмтээх тухай бодол төрж болдог. Ийм үед яаралтай мэргэжлийн тусламж авах шаардлагатай.

Эмчилгээ

Төрсний дараах сэтгэл гутрал нь эмчлэгдэх боломжтой эмгэг юм. Эмчилгээ нь дараах аргуудыг багтааж болно.

• Сэтгэлзүйн зөвлөгөө, сэтгэл заслын эмчилгээ.
• Гэр бүл, ойр дотнын хүмүүсийн дэмжлэг.
• Хангалттай амралт, унтах.
• Эрүүл, шим тэжээлтэй хооллох.
• Хөнгөн дасгал хөдөлгөөн хийх.
• Шаардлагатай тохиолдолд эмчийн заавраар эмийн эмчилгээ.

Гэр бүлийн гишүүдэд өгөх зөвлөмж

Ээжид дараах байдлаар тусалж болно.

• Шүүмжлэхээс илүү сонсож, ойлгох.
• Хүүхэд асрахад туслах.
• Амрах боломж олгох.
• Өдөр тутмын гэрийн ажилд дэмжлэг үзүүлэх.
• Шинж тэмдэг удаан үргэлжилбэл эмч, сэтгэлзүйчид хамт очих.